وقايت الله وقار صيب جالب شعر.

شعر

ای تف لعنت شه د ادب په دې ښکلا باندې

چــــې راچاپېر وي په کنځلو د ملا باندې

تنګ نظري نو به له دې کومه وي دوی لګيا دي

دا ټول فرهنګ تعريفوي ډول او نڅا بانــدې

دوی ته پردۍ ژبه محبوبه ده، پردي غږېږي

او شرم کاندي د خوږې پــــښتو وينا باندې

مونږ په تيارو بوخت يو، جګړې کوو، تيارې خوښوو

او خلک وګـــــورئ لانجه ېې ده رڼا باندې

زمونږ تحقيق د يو څو ټکو په محور څرخېږي

خو نور علمي بحثونه کړي ټوله دنيا باندې

عجېب مزل د ژوندانه دی چا په مينه وکړ

او ځينــــې ځينې ېې کوي مدام ژړا باندې

مونږ په غرور او سرلوړۍ مخته مزل لنډوو

راځه ملتيا وکړه، وياړمن به شې سودا باندې

دوی که په مال او چوکۍ فخر کړي، لګيا دې وي نو

مونږ مفـــتخر يو، خپل وقار، خپله وفا باندې

#د لوی اختر دويمه

#اختر مبارک 💝

وقايت الله وقار