د طرابلس زمريان , ليکنه : اسد الصحرا, سالم فکر اوکړئ!
د طرابلس زمريان , ليکنه : اسد الصحرا, سالم فکر اوکړئ!
• د طرابلس د بن غازي په بندرګاه د ایټالوي اشغالګرو قواوو کنټرول بشپړ سوی وو دغه ویجاړ سوی ښار په بشپړ ډول خاموش او چوپ وو یوازي د ایټالوي یرغلګرو د ټانګونو او پوځي موټرانو غرهار او ږغونو چې یو طرف او بل طرف ته په حرکت وه د ښار خاموشي ماتوله.
د ښار ټوله اطراف د اشغالګرو ایټالوي پوځیانو تر نظر لاندې وه، پوځي تدارکات په ډیر زور کې روان وه ولي ددې هر څه سره سره د مجاهدینو چریکي حملې په ډیره کامیابۍ سره پر مخ رواني وې.
د ایټالوي پوځ پوځي کمپ له ښار د باندې وو چې پر شاوخوا ئي اغزن سیم راګرځیدلی وو او په هرڅو متره کې په دغه پوځي کمپ باندې یو پهردار ولاړ وو او شاوخوا ئي تر نظارت لاندې وه، د ایټالوي دیکتاتور (موسولیني) د لاس آله ویني څښونکئ جنرال (ګرزیاني) چه یوه ورځ مخکې ئي پر (المریه) د مهاجرینو په کمپ حمله کړې وه بیرته راغلي وو، د نظامي پارکونو د یوه اتاق په برنډه کې تورن (برونوتیلي) د خپلي خور (فرانزا) سره چاي څښلې تورن برونو یو انګریزی ژورنالیست(خبرنګار) د چاي څښلو لپاره د خپل ځان خواته راوبلی ددغه خبرنګار نوم (فرانسیس مکولان) وو.
کله چې ایټالوي یرغلګرو د مجاهدینو پر مرکزو حملې کولې نو فرانسیس هم یو دوه واري ورسره تللی وو ولي پر (المریه) باندې تر حملو وروسته فرانسیس له بل واري تګ څخه په مکمل ډول انکار وکړ او له ځان سره ئي تصمیم ونیوی چه نور به هېڅکله له دغو ایټالوي عسکرو سره نه ځي هغه چې د ایټالوي یرغلګرو کوم ظلم او وحشت په دغو حملو کې ولیدی ډیر متأثره شو او په دغه باره کې ئي د جنرال ګرزیاني سره څو واري خبره هم تر جګړې رسولې وه او هغه ته ئي په ځغرده ویلي وه چې بیرته خپل وطن انګلستان ته ځي.
لاکن ویني څښونکي جنرال نه غوښتل د ظلم، وحشت او بربریت کوم داستان چې دوی په طرابلس کې د طرابلس پر وګړو جوړ کړي وو د طرابلس څخه د باندې واوریدل سي او اوریدونکي دغه داستان واوري، جنرال عقیده درلوده که چیري مکولان ولاړ سي خامخا به د ایټالوي پوځ د ظلم او وحشت قیصې بهر کوي چه دا به د ایټالوي پوځ لپاره زیاته بدنامي را منځ ته کړي په همدې توګه ده تورن برونو ته هدایت وکړ چې په هره ممکنه وسیله وکولاې شي د مکولان د تګ مخنیوی وکړي په همدې اړه برونو خبرنګار مکولان د چاي لپاره دعوت کړ.
مکولان په ډیر شدت او عصبانیت و تورن برونو ته وویل:
تورنه!نشم کولاې یوه لحظه هم دلته نور توقف او ځنډ وکړم.
تورن برونو ورته وویل که څه هم نشم کولاې تا دلته په پاته کیدو مجبور کړم خو تر اوسه تا زموږ نظامي عملیات د یوې شیبې لپاره هم نه دی لیدلي او د طرابلس جنګ به ډیر جوش پاروونکي وي.
مکولان په ډیر قهر او غوصه سره ځواب ورکړ: لعنت دي وي پر تاسي او ستاسو پر جګړه زه پناه غواړم په خدای سره آیا تاسو دغه وحشت او بربریت ته چې د طرابلس پر خلګو مو روان کړي دی نظامی عملیات وایاست؟
تورن برونو ورته وویل مکولان! حق لیدونکئ و اوسه!
آیا ته نه وینې چې سنوسي چریکان په څومره بې رحمۍ سره زموږ عسکر اعداموي.
مکولان جواب ورکړ: ستاسو عسکر! هغه عسکر چې د سنوسي مجاهدینو سره جنګیږي؟ هغو مجاهدینو سره چې د خپلي خاوري د خپل دین د خپل مذهب او خپلي عقیدې د دفاع لپاره خپلي ویني بهوي؟ هغوئ چې آزادی ئي غصب سوي او په خاوره او مقدساتو ئي تاسو تجاوز کړي دی؟
تورن ورته وویل: پوهیږم مکولان چې ته هم تر خپل حد پښه اړوې ته باید د یو خبرنګار په حیث دومره احساساتي نسې دا جنګ دی او په جنګ کې هرڅه روا دي! مکولان وویل: بیله شکه دا جنګ دی، خو تاسو نظامي افراد نه یاست بلکې یوه وحشي ډله او ویني څښونکي قاتلان یاست ما چې کوم شیان په دي څو ورځو کې ولیدل دا ددې لپاره کافي دي چې تر څو کالو پوري زما له سترګو خوب وتښتوي تاسو هغه کسانو ته نظامیان او سپاهیان وایاست چې ښځي تی خوړونکي او تی نه خوړونکي ماشومان په ډیره بې رحمۍ سره په لاسي توګه وژني چې څیرونکي حیوانات لاهم ستاسو له چلنده څخه د حیا پرده پر مخ غوړوي پاکي پیغلي،نجوني بي عزته کوي او وروسته ئي د وحشیانو په ډول په شهادت رسوي او ورباندې د لیونو په څېر په قهقهه خاندي، سپین ږیري او معذوره خلګ نیسي په درختو پوري ئي تړی او وروسته ئي وژني او بیا خپلو ځانو ته فاتحان وایاست؟
نه تورنه! دغه د فاتحانو کار نه بلکې دا د بزدلانو بې غیرتانو او ظالمانو خوی او کړنلاره ده نه د سپاهیانو ما جنګ عمومي لیدلی دی، د نازیانو ظلمونه مي مشاهده کړي دي، مګر د (ګرزیاني) شیطاني ډلي چې کوم څه زما په وړاندې د طرابلس د مظلوم اولس سره وکړل هغه ټول ویرونکي خاطرې ئي زما د زهن څخه و ایستلي او زه خپله هم دلته ستاسو سره په اوسیدلو خپل ځان یو درنده او وحشي شمیرم.
(برونو) یوه وحشي قهقهه خندا وکړل او وئي ویل ته یواځي یو خبرنګار نه بلکې یو ښه داستان جوړوونکي هم ئي! قهر دي نوش کړه او راځه چې ولاړ شو و کلوپ(شراب ځاي) ته او یو انګلیسي بوتل شراب وڅښو او خپل غم ورباندې غلط کړو.
مکولان جواب ورکړ: په دې ترتیب غواړي زما د تګ مانع وګرځې.
د تورن(برونو) خور(فرانزا) چې په دغه وخت کې په اتاق کې موجوده وه دغه ټولي خبري ئي واوریدلې کوم وخت چې د مکولان خبروته متوجه شوله له خپل ځان سره ئي وویل: که چیري دغه خبري چې مکولان وکړي واقعیت ولري او ددې ورور هم په رښتیا سره په دغه وحشیانه مظالمو کې شریک وي په رښتیا چې دغه خبره شرمناکه او ورور مي د کرکي وړ دی.
د ښځو او کوچنیانو عامه وژنه د ښځو بې عزتي او.........
نه، نه دا ډول نه ده ورور مي برونو هېڅکله د داسې وحشیانه اعمالو مرتکب نه ګرځي فرانزا چې دغه خبري له خپل ځان سره کولې د برنډې خواته ولاړله او یوې قدنما هندارې ته ودریدله تر څو خپل وریښتان ږمونځ کړي...برونو و دې ته ویلي وه په هر قیمت چې کیږي باید مکولان راضي سي تر څو پاته سي او که چیري راضي نه شو جنرال ګرزیاني به آزرده او خفه سي او فرانزا هم پوهیدله چې د ګرزیاني خوابدي کیدل یعني څه؟
هغه څوک چې د ګرزیاني تر قهر او ملامتي لاندې راځي نه دا چې له وظیفي باید لیري شي بلکې باید له ژونده هم لاس ووینځي.
په همدغه شیبه کې یو بل عکس هم په هنداره کې ښکاره شو، فرانزا د ډیري ویري څخه ولړزیدله یو نفر د اتاق د دروازي په خوله کې ولاړ او د ټوپک د میل خوله ئي د فرانزا و طرفته سمه کړي او ددې سینه ئي په نښان ورکړي وه. خپل مخ ئي په یوه تور دسمال پټ کړي ؤ په همدې خاطر نه پیژندل کیدئ چې څوک دی ولي فرانزا ئي د لباس څخه معلومه کړه چې عرب دی، راغلي پردي سړي په فرانزا ږغ وکړ چې که دي ږغ وکړ فیر به دي کړم او له ژونده څخه به دي بیغمه کړم.
فرانزا په خپل ځاي د بت په څېر وچه کلکه ولاړه وه او د سترګو لاندې ئي برنډې ته کتل برونو او مکولان لاتر اوسه په خپل منځ کې په مباحثه بوخت او د شاوخوا څخه ناخبره وه او راغلي سړي بې له شکه یو چریک عرب ؤ شاید دده نور ملګري هم له ده سره وي او په نظامي پایګاه د حملې لپاره راغلي وي په دې صورت کې د برونو او مکولان ژوند هم په خطر کې دی.
فرانزا چې په دغه فکرونو کې غرقه وه له خپل ځان سره ئي تصمیم ونیوئ چې باید په هر قیمت چې وي ورور او مکولان له پیښي څخه خبر کړي کرار کرار د ځوان عرب و طرفته ور روانه سوله او په ډیره فتنه انګیزه ډول ئي ورته وویل: څه شي غواړي؟
عرب ځوان چوپ وو او د اتاق د باندې ئي کتل فرانزا حیرانه وه چې دی څنګه توانیدلی ده چې دغه ساختمان ته راشي په داسې حال کې چه د نظامي پایګاه د باندې ډیره سخته پیره د ټولو لارو د ترصد او څار لپاره موجوده وه دغه ځاي ته ننوتل ډیر مشکل حتي له امکانه لیري وه.
فرانزا بل واري خاموشي ماته کړله وئي ویل:
که دي پیسې مطلب وي هر څومره چې غواړي دربه ئي کړم.
ځوان په قهریدلي لهجه ځواب ورکړ: ستاسو وحشي پوځیانو چې زما کوم دولت په غارت وړی دی کله کولاې شي چې بیرته ئي راکړي.
فرانزا په کهاله ډول و عرب ځوان ته وویل: زه وعده نشم کولاې ولي کوښښ به وکړم، ووایه هغوئ ستاسو کوم شي په غارت وړی دی؟
په داسې حال کې چې د ځوان سترګي د برق په څېر برېښېدې ځواب ئي ورکړ: د یوې بي ګناه، یوې باعفته خور ژوند......
فرانزا یو ځل بیا ولړزیده...مکولان رښتیا ویل دغه ځوان واقعاً خطرناکه دی، د نقاب پوښ ځوان اور غورځوونکي او قهریدلي سترګي په فرانزا ګنډل شوي وې.
فرانزا بیا وپښتل: آیا وتاته معلومه ده چې دغه ځاي په تورن برونو پوري مریوط دی؟تا خپل ځان و خطر ته غورځولی دی!
نقاب پوښ عرب وویل: ښه راته معلوم دی او زه هم په تورن برونو پسي راغلي یم.
فرانزا په حیرت و پوښتل ولي؟
نقاب پوښ: د پاره د انتقام اخیستلو....
فرانزا: آیا برونو ددغې پیښي مرتکب ګرځیدلی؟!
نقاب پوښ: بلي! هغه وحشي سپی او ته ئي خور ئي؟نه مګر؟
فرانزا: هو زه ئي خور یم او ته غواړي زما څخه غچ واخلې؟
ولي ګوري فیر وکړه!!
د نقاب پوښ عرب ګوته د ټوپک په ماشه ځاي په ځاي شوي وه سترګي ئي د وینو پیالي ګرځیدلي وې او له قهره ئي د اور غورځوونکي غره په څیر وړانګې پاشلې غوښتل ئي ماشه راکش کړي لیکن په همدغه شیبه کې له خپل دغه عزم څخه منصرف شو خپل ځان ئي ډیر ژر را کنټرول کړ او وئي ویل: نه هیڅ مسلمان د ښځو او ماشومانو سره ستاسو د وحشي او ویني څښونکو پوځیانو په څېر رویه نه کوي.
ته ډیر ژر تورن برونو دلته راوغواړه چې دلته راشي...ژرسه او فرانزا پوهیدله چې که چیري برونو دلته راشي څه به واقع شي دغه ځوان به د برونو په لیدلو سره هغه فیر کړي او خپل انتقام او غچ به واخلي، حیرانه وه او نه پوهیدله چې څه وکړي.
خو دفعتاً ئي له خپل ځانه سره فیصله وکړه او په ډیر اطمینان او باور نقاب پوښ عرب ته نږدې شوله او وئي ویل: متأسفانه نه شم کولاې هغه راوغواړم ولي ته هم کولاې شي خپل انتقام واخلي کولاې شي د برونو د خور سره هره رویه چې ستا زړه وغواړي وکړي. راسه ولي انتظار ئي؟
نقاب پوښ عرب په ډیره عصباني لهجه نعرې کړي ودریږه مسلمانان ستاسو د وحشیانو او بې دینو په څیر نه دي.
فرانزا په ډیره بیباکه ډول د ځوان وطرفته ور رهي شوله او غوښتل ئي په هر ډول چې کیږي برونو ته نجات ورکړي په همدغه لحظه کې د اتاق بلي دروازې څخه برونو اتاق ته داخل شو او په امرانه ډول ئي خور ته وویل: ته څه شي کوې ولي کلوپ ته...
ځوان عرب په ډیر سرعت د ټوپک ماشه کش کړله ولي فرانزا هم غافله نه وه پورته وغورځیدله او ورور ته ئي ټګان ورکړ مرمۍ د زړه څخه خطا او پر اوږه ولګیدله او برونو پر مځکه ورغړیدئ.
فرانزا په عرب راوځغستل تر څو ټوپک ئي له لاسه واخلي ولي عرب په ډیر زور فرانزا له ځانه پوري وهله او فرانزا د اتاق پر فرش راوغورځیدله په همدې وخت کې د عرب له مخ نه هغه دسمال چې ده ورباندې مخ پټ کړي وو لاندې ولویدئ. او فرانزا په ډیر حیرت سره وده ته کتل دې په خپل ټول عمر دارنګه ښایسته ځوان نه وو لیدلي مکولان په تلوار اتاق ته داخل شو او وئي پوښتل څه، څه وشول؟؟!
فرانزا متوجه شوله چې ورور ئي په ځمکه رغړي او غواړي ولاړ شي په ډیر سرعت سره ولاړه او خپل ورور ته ئي کومک ورکړ، او د آرامۍ ساه ئي وکښله چې ورور ئي د راغلي مرګ نه بچ شو...
بیرته راوګرځیدله تر څو وویني ځوان عرب څه شو هغه ئي ونه لیدئ ځوان غائیب شوي وو برونو د دروازې و طرفته وځغستل لاکن فرانزا دی پريښوئ او ورته وئي ویل: نه ممکنه ده دباندې نور چریک عربان هم پټ شوي وي په همدې وخت کې د دوو نفرو د قدمونو آوازونه چې د برونو د اتاق خواته را روان وه واوریدل شول کله چې را روان دوه نفره مسلح عسکر اتاق ته داخل شول او وروسته تر رسم تعظیم ئي وپښتل: څه خبره ده؟
موږ د فیر ږغ واوریدئ.
برونو ورته وویل: ای خرو نه ویني چې زخمي شوي یم حمله کوونکئ یو عرب چریک وو تاسې چیري غائیب واست؟؟هغه چریک څنګه داخل شو؟
عسکر په ډیر سرعت له اتاق څخه خارج شول او سمدستي ئي ډیره سخته تلاشي شروع کړه تر څو ځوان چریک عرب پیدا کړي مګر نه پوهیدل چې هغه جیري پټ شوي دی.
فرانزا ډیره خوښه وه چې عسکر ونه توانیدل چې عرب پیدا کړي، هغه عرب وو ددې د ورور د وژلو لپاره راغلي وو، هغه دښمن وو.
لیکن ولي فرانزا خوښه وه چې هغه نه شو پیدا؟
هغه د فرانزا زړه زخمي کړ ددې په نظر کې دهغه ښایسته څهره مجسم کیدله د خپل ځانه سره ئي ویل څومره پاک لمنی څومره باهیبته څومره ښه څهره داسې څهره چې په هغه کې عزم،استقلال او ایمان ځلیدئ.
که هغه غوښتي واي په ډیره اساني به ئي د خپلي خور انتقام اخیستي وای مګر په څومره استغنا او بې پروائي له خپل دغه موقعیت څخه تیر شو سره د فتنه انګیزئ هغه متوجه هم نشو آه، څومره جملې....
((هيڅ مسلمان د ښځو او ماشومانو سره داسې رویه نکوي لکه چې مکولان وویل))
مګر برونو په هغوئ رحم نه وو کړي، تورن برونو په ډیر عصباني لهجه سره و مکولان ته وویل: ودي لیدل چې عرب څومره وحشي او بي رحمه دي؟ اوس هم د هغوئ سره همدردي ښکاره کوې؟ناببره فرانزا نعرې کړي! هغه، هغه وحشي نه وو برونو! وحشي ته ئي بې رحمه ته، او ته د وحشت او بي رحمۍ سمبول ئي.
برونو په ډیر حیرت سره د خپلي خور و طرفته وکتل، فرانزا دوهم وار وویل هغه د خپلي خور د انتقام او غچ اخیستلو لپاره راغلي وو چې ستا د وحشت او درنده توب قرباني شوې ده تا ئي عزت او ابرو برباد کړه...
برونو په داسې حال کې له درده ئي سترګي پټي نیولي او له زخم څخه ئي هم ویني را رواني وې چیغه کړه فرانزا ته په هوښ کې ئي؟ته څه وائي؟
او فرانزا په ډک ستوني او له اوښکو ډکو سترګو ورته وویل:
هغه شجاع او غیور ؤ هغه د آسمان په څېر پاک او با عظمته وو هغه کولاې شواي ستا له خور سره هماغه معامله وکړي چې تا د هغه له خور سره کړي وه لیکن هغه داسې ونکړل او هغه داسې چلند غوره کړ چې زه به ئي تر عمره د احسان بار پر اږو وړم دښمن که دښمن وي خو چې شریف وي پروانلري. زه پردې اعتراف کولو ته اړه یمه چې هغه په هر صورت ستا او ستا د امیرانو څخه غوره دی....آه...
دا څرنګه وحشي عمل وو چې ته ئي مرتکب شوې؟
د هغې ژړا هغې ته امان ورنکړ. دغه جمله مکولان له خپل ځانه سره په داسې حالت کې تکرار کړه چې خپلي سترګي ئي په غوږو کې یوه آزانګه کوله چې تیره شپه ئي د برونو د خیمئ څخه اوریدلې وه.
دده په نظر کې یوه ښایسته معصوم او بې روح جسد مجسم شو چې ددغه شپې په سهار د برونو د خیمې شاته غورځیدلي وو، په داسې حال کې چې وریښتان ئي پاشلي پاشلي او کالي ئي څیري او مخ ئي په منګاچو څیري وو او دا مړی د ځوان عرب خور وه.
مکولان د اتاق څخه د وتلو پر مهال چیغي کړي تورن برونو!
فرانزا رښتیا وائي په رښتیا هغه عرب ځوان شجاع هم وو او غیور هم هغه یو سپاهي وو او د خپلي عقیدې لپاره جنګیدونکي.
0 Response to "د طرابلس زمريان , ليکنه : اسد الصحرا, سالم فکر اوکړئ!"
Post a Comment
السلام عليکم ورحمة الله وبرکاته ملګرو که تاسو هم خپلې ليکنې پدې سايټ کې نشرول غواړئ نو ما ته یې پدی ايمل را اوليږئ مننه: salemfo.online@gmail.com